ខ្ញុំមិនមែនជាអ្នកមានខ្លាំងប៉ុន្មានទេ ប៉ុន្តែក៏មានក្រុមហ៊ុនផ្ទាល់ខ្លួន និងឡានស៊េរីទំនើប មានទាំងអ្នកបើកជូនទៅធ្វើការផង ព្រោះវាជាទ្រព្យសម្បត្តិដែលឪពុកម្ដាយខ្ញុំខំរក រហូតផ្ទេរមកដល់ខ្ញុំខ្លះ។ ថ្ងៃមួយខ្ញុំបានបើកឡានដោយខ្លួនឯងទៅញាំគុយទាវ នៅហាងមួយមិនចាំឈ្មោះ ហើយក៏បានជួបនារីរត់តុម្នាក់ឈ្មោះ ជីលីន ដែលអាចនិយាយបានថា នាងជាមនុស្សដ៏សាមញ្ញម្នាក់ ប៉ុន្តែសម្រស់ធម្មជាតិពិតៗ ធ្វើឲ្យខ្ញុំចាប់ចិត្តយ៉ាងខ្លាំង។
គ្រាន់តែបង្ហើរសំឡេងមកសួរខ្ញុំថា “បងប្រុសចង់កុម្ម៉ង់អីដែរ” ក៏ធ្វើឲ្យខ្ញុំមានអារម្មណ៍ថាលង់ទៅហើយ ប៉ុន្តែព្យាយាមធ្វើធម្មតា។ ខ្ញុំក៏ឆ្ងល់អារម្មណ៍ខ្លួនឯងដែរ ហេតុអ្វីរំភើបចិត្តជាមួយកាយវិការដ៏សាមញ្ញ និងសម្ដីដ៏ទន់ភ្លន់បែបនេះ ព្រោះពីមុនមក ក៏មានការណែនាំឲ្យជួបនារីកូនអ្នកមានជាច្រើនដែរ តែខ្ញុំមិនអាចទទួលបានចរិតឆ្មើងឆ្មៃ និងការលេងខ្លួន តុបតែង សម្ដីមិនសមរម្យ។
ក្រោយពេលបានញាំលើកទី១ ហើយ ខ្ញុំក៏បន្តទៅទីនោះ រហូតលើកទី៥ ខ្ញុំដាច់ចិត្តសុំលេខទូរសព្ទនាងទាំងមុខក្រាស់។ នៅពេលយប់ ខ្ញុំក៏តេទៅនាង និយាយលេងសើចជាមួយគ្នា តែនាងក៏មិនដែលសួរអីពីខ្ញុំដែរ។ យូរៗទៅ បេះដូងកាន់តែរញ្ជួយ ខ្ញុំក៏ដាច់ចិត្តសួរពីប្រវត្តិនាង ទើបនាងប្រាប់ថា នាងត្រូវឡើងមកក្រុង រកការងារធ្វើ ដើម្បីលោះបំណុលឪពុកម្ដាយនៅស្រុក ព្រោះបងប្រុសនាងលេងល្បែងជំពាក់គេជុំទិស។
ខ្ញុំក៏បានប្រាប់នាងថា ខ្ញុំជាអ្នកមាន មានឡាន មានក្រុមហ៊ុន ថែមទាំងយល់ព្រមសងបំណុលឲ្យគ្រួសារនាងផង។ គិតទៅ ខ្ញុំប្រហែលជាខុស ព្រោះយកលុយ ឡាន ទៅធ្វើជាធ្នាក់ ឲ្យនាងលង់ស្នេហ៍ តែនាងមើលទៅពិតជាចរិតល្អ គួរឲ្យខ្ញុំស្រលាញ់មែន ទើបគិតថាការធ្វើបែបនេះមិនខុស។
យើងបានដើរលេងជាមួយគ្នាញឹកញាប់ ដោយប្រើឡានស៊េរីទំនើបរបស់ខ្ញុំ ហើយចេញពីធ្វើការខ្ញុំតែងទៅទទួលនាង ជូននាងទៅផ្ទះជួលវិញ។ ក្រោយមក ដំណឹងមួយនេះ បានធ្លាយដល់ឪពុកម្ដាយខ្ញុំ ធ្វើឲ្យពួកគាត់អន់ចិត្តយ៉ាងខ្លាំង ព្រោះណែនាំអ្នកមានឲ្យ បែរជាមិនស្រលាញ់ ទៅស្រលាញ់នារីរត់តុ។
ខ្ញុំបានរៀបរាប់ប្រាប់គាត់ថា នាងជាមនុស្សល្អ អាចមើលថែទ្រព្យសម្បត្តិដែលខ្ញុំមានឲ្យគង់វង្សទៅថ្ងៃក្រោយ។ ប៉ុន្តែឪពុកម្ដាយខ្ញុំ ចេះតែប្រកែកថា មិនមែនស្នេហ៍ស្មោះទេ គឺនាងមើលឃើញលុយ ស្រលាញ់អ្នកមានប៉ុណ្ណោះ មិនមែនស្រលាញ់ខ្ញុំទេ ហើយក៏ប្រហែលគ្មានចិត្តស្មោះដែរ។
ដើម្បីឲ្យដឹងការពិត ខ្ញុំក៏ធ្វើជាសាកចិត្ត ហើយថ្ងៃមួយខ្ញុំបានដឹកឪពុកម្ដាយខ្ញុំទៅ ដោយគាត់អង្គុយពីក្រោយទាំង២នាក់។ នាងជាអ្នករត់តុដូចរាល់ដង ប៉ុន្តែថ្ងៃនោះខ្ញុំអត់បានចូលតុទេ គឺនៅឈរយាមឡាន ធ្វើជាអ្នកបើកឡាន ចំណែកឪពុកម្ដាយខ្ញុំចូលទៅទទួលទានគុយទាវ ដើម្បីមើលពីចរិតនាងផង។
យប់នោះ ខ្ញុំបានតេទៅនាង ប្រាប់នាងថា៖ “ជីលីន បងជាអ្នកបើកឡានឲ្យគេទេ លុយដែលបងជួយអូន គឺខ្ចីពីថៅកែ ហើយឡាននោះគឺឡានថៅកែ… សុំទោសបងធ្វើបែបនេះ ព្រោះបងស្រលាញ់អូន តែបងមិនអាចលាក់អូនរហូតទេ…. កុំទៅណាចោលបងបានទេ?”។ ស្ដាប់ចប់ភ្លាម ជីលីន មិនបាននិយាយអីទេ បន្តិចក្រោយមក ក៏លឺសំឡេងយំ រួចបិទទូរសព្ទ។
ខ្ញុំគិតថា ប្រាកដជានាងខឹង នាងមិនបានស្រលាញ់ខ្ញុំទេ គឺស្រលាញ់ព្រោះខ្ញុំជាអ្នកមានប៉ុណ្ណោះ។ ខ្ញុំក៏មានចិត្តខឹងនាងដែរ ទើបសម្រេចចិត្តទៅនិយាយការពិត ឲ្យដឹងគ្នាម្ដង ឲ្យដឹងថានាងជាស្រីមុខលុយ។ ខ្ញុំបានបើកឡាន ទៅម្ដងទៀត ដោយដឹកឪពុកម្ដាយខ្ញុំទៅពិសាគុយទាវដូចមុន។
ខ្ញុំគិតថា ចាំឪពុកម្ដាយពិសាគុយទាវរួច ចាំនិយាយឲ្យនាងឈឺចាប់ម្ដង ចាំប្រាប់ថាខ្ញុំជាកូនអ្នកមាន មិនមែនអ្នកក្របើកឡានឲ្យគេទេ។ តែពិតជានឹកស្មានមិនដល់ នាងបានយកលុយគ្រប់ចំនួន ដែលខ្ញុំជួយនាង មកឲ្យខ្ញុំ រួចប្រាប់ថា ជាលុយដែលនាងសន្សំ និងខ្ចីប្រាក់ខែពីថៅកែ ២ឆ្នាំមុន ព្រោះនាងអាណិតខ្ញុំ ដែលខ្ចីលុយគេមកជួយនាង និងខ្លាចដឹងរឿង យកឡានមកដឹកនាងដើរលេងផង។
ខ្ញុំចាប់ផ្ដើមគាំង ព្រោះមិនដឹងនិយាយពីអី ស្រាប់តែនាងអូសដៃខ្ញុំទៅជិតឡាន រួចនិយាយដោយក្ដុកក្ដួលចិត្តថា៖ “អូនស្អប់បង អូនខឹងបង ហេតុអ្វីមិនប្រាប់ការពិត ហេតុអី ចង់ធ្វើឡូយ ដើម្បីឲ្យអូនស្រលាញ់… អូនស្រលាញ់ ទោះបងជាអ្វីក៏ដោយ… ទ្រព្យសម្បត្តិអស្ចារ្យមែន តែមិនអាចទិញក្ដីស្រលាញ់ដ៏ស្មោះបានទេ… អូននៅតែស្រលាញ់បងជាបង ទោះបងជាអ្នកបើកឡានឲ្យគេ ឲ្យតែស្រលាញ់ស្មោះ ថ្ងៃក្រោយយើងអាចរកលុយបានហើយ”។
ទឹកភ្នែកខ្ញុំ ចាប់ផ្ដើមរមៀលស្រក់ចុះ សម្ដីដែលលាក់ទុកក្នុងមាត់ ចង់និយាយដៀលនាងថា “ស្រីមុខលុយ” ក៏រលាយបាត់អស់ ប្ដូរមកវិញនូវការស្រលាញ់ និងអាណិតពេញបេះដូង។ ចំណែកឪពុកម្ដាយខ្ញុំ បានលួចស្ដាប់ជិតឡាននោះ ក៏បង្ហាញខ្លួន ដោយការរំភើបចិត្តពេកក្រៃ។
“ជីលីន នាងពិតជាមានចរិតល្អ ស្រលាញ់ស្មោះ ដូចកូនមីងបាននិយាយមែន។” ម្ដាយខ្ញុំបាននិយាយដាក់នាង។ ជីលីន លឺភ្លាម ក៏ភាំងចិត្តម្ដងទៀត ព្រោះមិននឹកស្មានដល់ថា នេះជាការសាកចិត្តឡើយ។ យ៉ាងណា ពេលនោះ ឪពុកម្ដាយបានយល់ព្រមឲ្យខ្ញុំ រៀបការជាមួយនាង ឈប់ឲ្យនាងធ្វើជាអ្នករត់តុ រហូតពេលនេះមានកូន ២នាក់ទៅហើយ។
ចំណែកឪពុកម្ដាយ ជីលីន ក៏ខ្ញុំបានជួយឲ្យរស់ស្រួលបន្តិចដែរ ព្រោះ ជីលីន បានជួយការងារជាច្រើនឲ្យរីកចម្រើន ទោះនាងមិនសូវបានរៀនខ្ពស់ក៏ដោយ៕
រឿងខាងលើនេះ ចង់បង្ហាញថា ក្ដីស្រលាញ់ពិត អាចឃើញច្បាស់នៅគ្រាក្រ។ មនុស្សភាគច្រើន ស្រលាញ់ពេលសប្បាយ ស្រលាញ់ពេលមានលុយ និងមើលឃើញផលប្រយោជន៍ លុះលែងមានផលប្រយោជន៍ ក៏អស់ក្ដីស្រលាញ់ដូចគ្នា។ បើចង់រកមនុស្សម្នាក់ដែលស្រលាញ់ស្មោះ សូមកុំបង្ហាញអ្វីដែលអ្នកមាន ព្យាយាមទម្លាក់ខ្លួនឲ្យដល់បាតសិន៕
អត្ថបទ៖ ចាន់ តារារស្មី
